ఢిల్లీలో గ్యాంగ్‌వార్ కలకలం.. లారెన్స్ బిష్ణోయ్ లీగల్ టీమ్‌పై కాల్పులు!

దేశ రాజధాని ఢిల్లీలో మరోసారి కాల్పుల ఘటన తీవ్ర కలకలం రేపింది. గ్యాంగ్‌స్టర్ లారెన్స్ బిష్ణోయ్ తరఫు న్యాయవాది రజనీ ఖత్రీ భర్త ప్రయాణిస్తున్న కారుపై గుర్తుతెలియని దుండగులు కాల్పులకు తెగబడ్డారు. మంగళవారం రాత్రి ఉత్తర ఢిల్లీలోని కశ్మీరీ గేట్ ప్రాంతంలో జరిగిన ఈ ఘటనలో ఒక వ్యక్తి గాయపడ్డారు.

మంగళవారం రాత్రి 10:15 గంటల సమయంలో బిష్ణోయ్ న్యాయవాది రజనీ ఖత్రీ భర్త దీపక్ ఖత్రీ, తన స్నేహితులతో కలిసి సియాజ్ కారులో వెళ్తున్నారు. ఆ సమయంలో బైక్‌పై వచ్చిన దుండగులు కారును వెంబడించి వెనుక నుంచి నాలుగైదు రౌండ్లు కాల్పులు జరిపి పరారయ్యారు. ఈ ఘటనలో కారు వెనుక అద్దాలు ధ్వంసమవగా, దీపక్ ఖత్రీ స్నేహితుడు సందీప్ భుజంలోకి బుల్లెట్ దూసుకెళ్లింది. కారులో మొత్తం ఐదుగురు ఉండగా, ఘటన జరిగినప్పుడు న్యాయవాది రజనీ ఖత్రీ అందులో లేరని పోలీసులు స్పష్టం చేశారు.

సమాచారం అందుకున్న వెంటనే పోలీసులు ఘటనా స్థలానికి చేరుకుని గాయపడిన సందీప్‌ను ఆసుపత్రికి తరలించారు. "రాత్రి 10:10 గంటలకు కశ్మీరీ గేట్ వద్ద కారుపై కాల్పులు జరిగినట్లు మాకు సమాచారం అందింది. ఈ ఘటనలో ఒకరు గాయపడ్డారు. వెంటనే దర్యాప్తు ప్రారంభించాం" అని ఉత్తర ఢిల్లీ డీసీపీ రాజా బంథియా తెలిపారు. ప్రత్యర్థి ముఠా పనే ఈ దాడికి కారణమై ఉండొచ్చని పోలీసులు అనుమానిస్తున్నారు. స్పెషల్ సెల్, క్రైమ్ బ్రాంచ్ బృందాలు రంగంలోకి దిగి సీసీటీవీ ఫుటేజీ ఆధారంగా నిందితుల కోసం గాలిస్తున్నాయి.